Singil sa kuryente ng Meralco, Pinaiimbestigahan ni Diokno.

Muling kinalampag ni Assistant Minority Leader at Akbayan Party-list Rep. Chel Diokno ang Mababang Kapulungan ng Kongreso upang simulan na ang pormal na imbestigasyon hinggil sa biglaan at hindi maipaliwanag na pagsipa ng singil sa kuryente. Ang panawagan ng mambabatas ay bunsod ng baha ng mga reklamo mula sa mga ordinaryong konsiyumer laban sa dambuhalang power distribution company na Manila Electric Company (Meralco). Giit ni Diokno, dapat nang aksyunan sa lalong madaling panahon ang inihain nilang House Resolution (HR) No. 995 upang matigil ang aniya’y mabigat at malabong pasanin sa bulsa ng taumbayan.

Sa kanyang pahayag nitong Martes ng umaga, Hulyo 14, ibinunyag ng abogado at mambabatas na marami ang lumalapit sa kanyang tanggapan dahil sa magkakaparehong suliranin. Bukod sa buwanang bill, inirereklamo ng mga residente ang biglaang pagpataw ng Meralco ng napakalalaking multa o penalties dahil umano sa mga nakitang “jumper” o manipulasyon sa metro (tampering). Nais mabatid ng mambabatas kung naging kalakaran na ba ito ng kompanya na nagpapahirap pa lalo sa mga pamilyang nagdarahop.

Partikular na inaatasan ng HR No. 995 ang House Committee on Energy na magsagawa ng pagdinig, in aid of legislation, ukol sa kamakailang surge o pagtalon ng bayarin sa kuryente. Kasama ring pinabubusisi sa resolusyon ang epekto ng lifeline rate subsidy at ang iba’t ibang uri ng “pass-through charges” na awtomatikong ipinapasa sa mga konsiyumer. Inihain ang naturang panukala noong nakaraang Mayo matapos mapuno ang publiko sa sunod-sunod na mataas na singil sa gitna ng krisis sa ekonomiya.

Batay sa resolusyon na binuo nina Diokno, binubuwisan at pinagbabayad ang mga consumer sa napakaraming breakdown sa kanilang billing statement. Kabilang dito ang generation charges, transmission charges, system loss charges, universal charges, lifeline subsidy rate, Feed-in Tariff Allowance (FIT-All), Green Energy Auction Allowance (GEA-All), missionary electrification charges, at iba pang mga buwis. Layunin ng imbestigasyon na busisiin kung makatwiran, transparent, at patas ba ang mga karagdagang bayaring ito o kung may pang-aabuso nang nagaganap.

Ipinaalala naman ni Diokno sa publiko na may sandata ang mga konsiyumer sa ilalim ng batas upang ipagtanggol ang kanilang sarili. Binigyang-diin niya ang Article 9 ng Magna Carta for Residential Electricity Consumers ng Energy Regulatory Commission (ERC), kung saan nakasaad na may karapatan ang bawat mamamayan na ipasuri nang direkta sa ERC ang kanilang mga metro kung duda sila sa itinatala nitong konsumo. Kinalampag niya ang ahensya na gampanan ang kanilang tungkulin na protektahan ang karaniwang Pilipino at hindi ang mga dambuhalang korporasyon.

Ang HR No. 995 ay magkakasamang inakda nina Diokno, Akbayan Reps. Perci Cendaña at Dadah Kiram Ismula, at Dinagat Island Rep. Kaka Bag-ao. Sa ngayon, umaasa ang mga mambabatas na diringgin ng liderato ng Kamara ang hiling ng milyun-milyong motorista at residente na nagnanais lamang ng transparency at makataong presyo ng kuryente sa bansa.