Muling nakakuha ang Office of the Vice President (OVP) ng pinakamataas na grado mula sa Commission on Audit (COA) matapos nitong tanggapin ang isang unmodified opinion para sa financial statements nito noong nakaraang taon ng pag-uulat (2025). Ito na ang ika-apat na sunod-sunod na taon na nakakuha ang tanggapan ng pinakamataas na klasipikasyon ng audit.
Ang tuloy-tuloy na pagkilala ay naganap sa ilalim ng pamumuno ni Bise Presidente Sara Duterte. Ayon sa COA, ang ganitong uri ng opinyon ay ibinibigay lamang kapag napatunayan ng mga auditor na ang mga ulat-pinansyal ng isang ahensya ng pamahalaan ay inihanda nang patas at tapat sa lahat ng materyal na aspeto.
“Sa aming opinyon, ang mga kalakip na pahayag ng pananalapi ay nagpapakita nang patas, sa lahat ng materyal na aspeto, sa katayuang pinansyal ng OVP noong Disyembre 31, 2025,” pahayag ng COA sa inilabas nitong ulat. Pasok din sa International Public Sector Accounting Standards (IPSASs) ang naging pagtatala ng ahensya sa kanilang cash flows at badyet.
Ikinagalak naman ng pamunuan ng OVP ang naging desisyon ng mga state auditors. Ayon sa pahayag ng tanggapan, ang mataas na rating na ito ay repleksyon ng kanilang walang humpay na pangako sa transparency, pananagutan, at responsableng pamamahala sa kabang-yaman ng bansa.
Idinagdag pa ng OVP na ang pagkilalang ito ay lalo pang nagpapatibay sa kanilang pagsunod sa mga prinsipyo ng mabuting pamamahala o good governance. Nagpapakita rin umano ito na ang bawat pisong inilaan sa kanilang tanggapan ay nagagamit sa mga tamang programa at mga pampublikong serbisyo para sa mga Pilipino.
Ang unmodified opinion ay itinuturing na pinakamagandang marka na maaaring makuha ng isang ahensya mula sa COA dahil nangangahulugan itong walang nakitang malaking iregularidad sa kanilang mga transaksyon. Mag-log on sa aming opisyal na website upang tingnan ang buong ulat ng COA at ang mga detalye ng naging paggasta ng OVP.