Malacañang sa Tax Records ni VP Sara: Pagbubukas, Aaralin ni PBBM.

Inihayag ng Malakanyang na nakahandang suriin ni Pangulong Ferdinand Marcos Jr. ang anomang pormal na hiling na naglalayong mag-awtorisa sa pagbubukas ng kontrobersyal na “green box” na naglalaman ng mga tax record nina Bise Presidente Sara Duterte at ng kanyang asawang si Atty. Manases Carpio. Ayon kay Presidential Communications Office (PCO) Undersecretary at Palace Press Officer Claire Castro, tiyak na dadaan sa masusing pag-aaral ng ehekutibo ang usapin upang matukoy ang nararapat na aksyon. Gayunpaman, nilinaw ni Castro na sa kasalukuyan ay wala pang anomang opisyal na sulat o hiling na nakakarating sa opisina ng Pangulo hinggil dito.

Ang naging pahayag ng Palasyo ay kasunod ng naging paalala ni Senador Panfilo “Ping” Lacson na hindi siya boboto o makikibahagi sa anomang sapilitang pagbubukas sa naturang BIR box nang walang malinaw at nakasulat na pahintulot mula sa Pangulo. Binigyang-diin ni Lacson na ang pagbubukas ng mga confidential na dokumento ng buwis nang walang presidential authority ay tahasang paglabag sa Sections 71 at 270 ng National Internal Revenue Code (NIRC) pati na sa mga umiiral na jurisprudence ng Korte Suprema. Ayon sa mambabatas, kahit ang mismong impeachment court ay hindi maaaring lumabag sa mga itinakda ng batas.

Bago ito, ipinag-utos na ni Senate Impeachment Court Presiding Officer at Senate President Francis “Chiz” Escudero na ibalik muna ang “green box” sa Bureau of Internal Revenue (BIR). Paliwanag ng hukuman, hindi pa pormal na kinukuha ng Senado ang legal na kustodiya sa mga naturang dokumento at hindi pa rin ito opisyal na namamarkahan bilang ebidensya. Una nang binuweltahan ng defense team ng Bise Presidente ang pagpapakita sa naturang kahon sa pre-trial conference, kaya naman nagpasya ang pamunuan ng Senado na ibalik muna ito nang walang bawas o pinsala.

Sa ngayon, nakabitin ang kapalaran ng “green box” sa kung maghahain ng pormal na mosyon ang prosekusyon para sa pagpapalabas ng subpoena na kakailanganin naman ng lagda ng Pangulo. Habang patuloy na naghaharap ng mga testigo ang magkabilang panig hinggil sa iba pang Articles of Impeachment, partikular na ang isyu ng grave threats at inciting to sedition, nananatiling nakaabang ang publiko kung mapipilitan nga bang mabuksan ang mga itinatagong talaan ng buwis ng pamilya Duterte.